Index   Back Top Print

[ LA ]

PIUS PP. X

EPISTOLA

PII PP. X GRATIAS AGENTIS MACHINATORI RAZZOLINI
PRO OBLATA DANTIS ALIGHERII COMOEDIA*

DILECTO FILIO
ATTILIO RAZZOLINI, MACHINATORI - FLORENTIAM

 

Dilecte Fili, salutem et Apostolicam benedictionem.

Exemplar libentissime excepimus Divinae Aligherii Comoediae, quam eximiis illustrem tabulis elegantique excultam manu edidisti. Gratum Nobis ac iucundum humanitatis observantiaeque munus: gratior autem insignis operis artificiique conspectus. Virtus sane tua ac peritia avitum italicae claritudinis decus exauget, in qua unam omnium nobilissimam comitem ac famulam carminum Aligherii reperias. Quapropter gratulationem a Nobis accipias ac laudem, singularemque, qua praestas, artem maiore in dies studio tractans, egregia religionis litterarumque monumenta celebrare ne desistas. Praemio pietatem industriamque tuam, benevolentis animi pignore, honestantes, auspicem caelestium donorum Apostolicam Benedictionem amantissime tibi impertimus.

Datum Romae apud S. Petrum, die VIII Aprilis MDCCCCIV, Pontificatus Nostri anno primo.

 

PIUS PP. X


*AAS, vol. XXXIX (1906), p. 23.



Copyright © Dicastero per la Comunicazione - Libreria Editrice Vaticana