The Holy See
back up
Search
riga

VIAGGIO APOSTOLICO IN COREA, PAPUA NUOVA GUINEA,
ISOLE SALOMONE E THAILANDIA

 

SANTA MESSA PER L'EVANGELIZZAZIONE

OMELIA DI GIOVANNI PAOLO II

Mount Hagen (Papua Nuova Guinea)
Martedě, 8 maggio 1984

 

"Bikpela Jisas Krais i ken marimari long yupela, na God i ken sori long yupela, na Holi Spirit i ken pas wantaim bel bilong yupela olgeta"[1].

Mi gude long yupela ol pipel bilong hailens na ol manmeri bilong Papua Nugini. Mi tok gude long yupela ol manmeri bilong ol planti lain na planti kastam na ol kainkain tok-ples.

Mi givim gude long yupela ol pikinini bilong Sios na yupela al bilip-manmeri bilong Mount Hagen stret. Yupela i save onarim tru santu Trinita. Yupela i kaikai dispela wanpela bret, em i santu Oikaristia na bodi bilong Krais. Olsem na yupela i kamap wanpela pipel bilong God, bodi-hait bilong Krais na santu Sios bilong em.

Wanhandet yia i go pinis, Sios i stap long Papua Nugini, i kamap. Tude em i amamas tru long bung wantaim Sios bilong olgeta hap bilong graun, long wanem Bisop bilong Rom, em i holim ples bilong santu Pita, i stap wantaim yupela.

2. Stori bilong gutnius i kamap long kantri bilong yupela, na Sios i kamap bikpela long en, tupela wantaim i soim klia tru ol bikpela na naispela wok, Lord i bin mekim namel long yupela. Orait, yumi ken lukluk liklik, olsem wanem dispela hap stori bilong God i redimim ol manmeri, i kamap long kantri bilong yupela.

Pastaim tru sampela lain misinari i traim long bringim gutnius long kantri bilong yupela, tasol ol i go bek gen. Bihain, olsem wanhandet yia i go pinis, wanpela narapela lain misinari i kamap, na nau ol i stap olgeta. Long dispela taim wok-misin i kirap tru. Ol MSC[2] i bin bringim tok bilong Jisas i kam long Nu Briten Ailan na long hap bilong Papua. Sampela yia bihain ol SVD[3] i bin kam long nabis bilong bikples Nugini. Na ol Maris[4] i bin kirapim lotu long Bougainville Ailan.

Long dispela foapela hap bilong wok-misin, faivpela as-ples bilong Katolik Sios i kamap: Rabaul, Papua, Is Nugini, Sentrel Nugini na Not Solomons. Bihain, long yia 1966, ol i kamap pianti moa yet, inap long wantenfaiv. Long dispela taim, yangpela Sios i stap long Papua Nugini, em i no moa olsem liklik pikinini i stap long han bilong ol misinari tasol. Nogat. Sios nau i strong pinis na i kamap bikpela moa. Olsem na Papa santu[5] i givim nem ' daiosis ' long ol dispela wanwan hap bilong Sios long Papua Nugini. Tude i gat fopela Arsdaiosis, em ol Arsbisop i stap long ol, na wantenfoa daiosis wantaim ol bisop bilong ol:

Rabaul, wantaim ol daiosis bilong Bougainville na Kavieng,

Port Moresby, wantaim ol diaosis bilong Alotau-Sideia, Bereina, Daru na Kerema;

Madang, wantaim ol daiosis bilong Aitape, Lae, Vanimo na Wewak; na

Mount Hagen, wantaim ol daiosis bilong Goroka, Kundiawa, Mendi na Wabag.

Tru, Sios i putim pinis rop bilong em long olgeta hap namel long ol pipel dispela kantri: pastaim lotu i pas long ol liklik ailan bilong yupela; bihain em i kamap long bikpela ailan bilong Nugini stret.

Tude yumi bung hia, na wantaim olgeta manmeri bilong Sios i stap long Papua Nugini, yumi olgeta i laik givim ona na tenkyu long santu Trinita, long wanem God i mekim kamap ples klia pinis tingting bilong em bilong oltaim, namel long ol pipel bilong en i stap long dispela kantri: em dispela tingting long autim gutnius na redimim olgeta manmeri. Santu Pol i rait long en long leta bilong em i go long ol Efesas.

3. Long taim God i makim, olgeta tok-hait i stap long em, na em i kamapim pinis long Krais, i kamap ples klia long of pikinini manmeri bilong Papua Nugini. Em ol dispela tok-hait, pastaim Holi Spirit i autim long ol aposel wantaim ol profet. Ol dispela samting hia i kamap tru long de bilong Pentekos.

Long wok-misin bilong Sios, na long gutnius em yet i autim, yupela ol manmeri bilong dispela kantri "yupela i kamap wanlain na wanpela bodi wantaim mipela. Na yumi olgeta yumi save kisim olgeta samting God i bin makim bilong yumi long Krais Jisas"[6].

Ol dispela lain manmeri bilong bipo, ol i stap insait long wok bilong autim tok bilong Jísas, na ol lain bilong tude — mi tok hia long ol misinari na long ol arapela i helpim ol; mi tok long ol i stap yet na long ol indai pinis — tude ol i givim bikpela tenkyu longs antu Trinita, bikos God "i givim dispela marimari long ol: em i putim ol long wok bilong autim gutnius long ol narapela lain. Em i gutnius bilong olgeta gutpela samting bilong Krais, na man yet em i no inap painim dispela. God i bin wokim olgeta samting, na pastaim em i haitim tingtong bilong en long olgeta pasin em i laik mekim. Na dispela tingting i stap hait long olgeta taim bipo. Tasol nau em i putim ol long wok bilong autim klia dispela tingting bilong em"[7].

4. Long dispela Misa hia yumi laik go long Papa bilong yumi i stap long heven na long "Krais Jisas, Bikpela bilong yumi. Yumi bilip long em na yumi no pret. Yumi save gut, Krais em i rot bilong yumi kamap long God" [8].

Yumi tingim yet prea bilong Krais long strongim ol disaipel bilong em pastaim long de em i karim pianti pen na indai: "Papa holi, yu lukautim ol, na bai ol i stap long nem bilong yu, dispela nem yu bin givim long mi. Oisem na ol i ken i stap wanpela tasol, olsem yumi- tupela i stap wanpela tasol"[9].

"Yu mas mekim ol i kamap holi long tok tru. Tok bilong yu em i tru. Bipo yu salim mi na mi kam i stap namel long ol manmeri bilong graun. Olsem tasol mi salim ol tu ol i go i stap namel long ol manmeri bilong graun. Na mi givim laip bilong mi yet bilong helpim ol, bai tok tru i ken mekim ol i kamap man tru bilong yu"[10].

Em hia prea bilong Krais i go long Papa bilong em long de i go pas long indai bilong em. Em i no pre tasol bilong helpim ol aposel, ol i stap wantaim em long bikpela rum-antap. Em i pre tu bilong helpim ol i harim tok bilong ol na ol i bilip long em[11].

Em i pre bilong helpim ol i bin bringim lait bilong Evangelio i kam long Papua Nugini.

Em i pre bilong helpim ol i bin holim pas dispela gutnius, ol arapela i autim long ol long nem bilong em, long dispela wanhandet yia i go pinis.

Em i pre bilong helpim ol i autim bilip bilong ol long em, na nau ol yet i bringim gutnius long ol narapela manmeri.

Long dispela bikpela prea bilong em, pastaim long indai bilong em, Jisas i pre tu bilong helpim olgeta manmeri, bai ol i ken bilip long em, inap long las de. Em i tingim olgeta pipel na olgeta kantri long prea bilong em, olsem em i tingim ol tu long wok-redima, em yet i mekim kamap long diwai-kruse na long kirap bilong em.

5. Tude wantaim yupela mi laik givim tenkyu na ona long santu Trinita, long wanem ol pipel bilong Papua Nugini, ol i lain bilong God nau. Ol i wanpela pipel, Jisas i redimim long blut bilong em i dia tumas. Mi autim tenkyu bilong mi, bikos yupela i bung wantaim Sios bilong Krais, na bikos yupela i kamap wanbel, taim yupela i bung wantaim Papa na Son na Holi Spirit, i olsem Krais i pre long bikpela prea bilong em, pastaim long indai bilong em: "Mi laikim dispela olgeta man i stap wanbel, olsem yu Papa, yu stap long mi na mi stap long yu. Olsem tasol mi laikim ol i stap long yumitupela. Olsem na ol manmeri bilong graun ol i ken bilip long yu bin salim mi na mi kam... na yu laikim ol olsem yu bin laikim mi"[12].

Mi pre bai dispela marimari bilong God i kamap ples klia moa yet insait long yupela na namel long yupela; bai em i go pas long yupela long taim i kamap bihain; na bai em i helpim yupela long taim yupela i stap laip hia long graun. Tru, graun bilong yupela em i naispela moa! — Olsem na yupela i no ken lusim tingting long laip bilong oltaim, na long bung wantaim God long heven.

Em tau "tingting bilong God long olgeta pasin em i laik mekim na em i stap hait long olgeta taim bipo"[13], bai i ken kamap ples klia tru long laip bilong wanwan bilong yupela na long olgeta manmeri — em i dispela tingting bilong oltaim, God Papa i bin mekim kamap "long wok bilong Jisas Krais, Bikpela bilong yumi"[14].


Atto di affidamento a Maria

 

Nau bihain long santu Misa hia long Mount Hagen, yumi tanim tingting na bel bilong yumi i go long santu Maria Virgo:

O Maria, Mama bilong God, mi tenkim yu long bikpela laik yu soim long ol pikinini bilong yu long Papua Nugini. Olsem gutpela mama, yu bin lukautim ol misinari ol i bin autim gutnius bilong pikinini bilong yu long dispela kantri.

O gutpela mama i klin olgeta, mi oferim long yu olgeta pikinini bilong yu insait long Sios, na olgeta manmeri bilong dispela kantri. Mi putim long han bilong yu ol bisop, pris na diken, ol i wok long autim gutnius bilong wok-redima hia long Papua Nugini. Mi putim long han bilong yu ol bruder na ol sister, ol i lukluk long yu yet, na ol i bihainim yu long laip na wok bilong ol.

O Mama bilong God, mi putim long han bilong yu ol katekis na ol Sios lida, ol famili, ol sikman, ol manmeri i gat bevi, ol lain i stap long kalabus na ol i nogat wanpela pren, ol yangpela na ol lapun, na olgeta narapela pipel bilong Papua Nugini. Gutpela mama, mi askim yu long bringim ol i go long pikinini bilong yu wanpela tasol, em i redima bilong graun, bai em i ken strongim ol i gat pen, na brin gim i kam bek ol lain i stap long sin, na givim bel isi long ol tarangu i gat hevi.

O mama bilong ol aposel na mama bilong Sios, mi putim long han bilong yu bikpela wok bilong telimautim gutnius bilong Krais, na husat ol i wok long autim dispela gutnius, bai kingdom bilong God i go het. Mi singaut strong long yu bai yu askim pikinini bilong yu, Jisas, long givim tingting long pianti yangpela manmeri bilong dispela kantri, bai ol i kamap pris, bruder na sister, bilong mekim wok bilong God. "Olsem na yupela i mas pre long Papa bilong gaden, bai em i ken salim ol wokman i go bungim kaikai bilong em"[15].

O Mama bilong God, soim mipela rot painim gutpela sindaun olsem pikinini bilong God hia long graun na bihain long heven.

Ol i onarim pikinini bilong bel bilong yu, Jisas!


[1] 2 Cor. 13, 13.

[2] Missionarii Sacratissimi Cordis Iesu.

[3] Societas Verbi Divini.

[4] Institutum Fratum Maristarum a Scholis.

[5] Pol namba 6.

[6Eph. 3, 6.

[7] Ibid. 3, 8-9.

[8] Ibid. 3, 11-12.

[9] Io. 17, 11.

[10] Ibid- 17, 17-19.

[11] Cfr. Ibid. 17, 20.

[12] Io. 17, 21. 23.

[13] Eph. 3, 9.

[14] Ibid. 3, 11.

[15] Luc. 10, 2.

 

© Copyright 1984 - Libreria Editrice Vaticana

 

top