Attentis conclusionibus et studio rationum theologicarum pastoraliumque necessitatum ad ritus Beatificationis seu Canonizationis pertinentium censitis, a Summo Pontifice Benedicto XVI nuper approbatis, haec Congregatio de Causis Sanctorum
novas dispositiones,
quae sequuntur, renuntiat.

1. Pro firmo sumpto usu, quo canonizationi, quae Beato cultum Ecclesiae universae tribuit, tantummodo Summus Pontifex praesideat, beatificatio, quae actus est Supremae Auctoritatis, a Delegato a Summo Pontifice ad hoc nominato, plerumque scilicet Praefecto Congregationis de Causis Sanctorum, celebrabitur.
2. Ritus beatificationis in dioecesi, quae Causam novi Beati promovit, vel in alio loco idoneo celebrabitur.
3. Episcopis Actoribusque Causae postulantibus, attento Secretariae Status consilio, ritus beatificationis in ipsa Urbe celebrari possit.
4. Qui ritus, demum, in celebratione Eucharistiae agetur, dummodo peculiares rationes liturgicae ne eum in celebranda Liturgia Verbi vel Liturgia Horarum effici subiciant.

E Civitate Vaticana, die 29 mensis Septembris, anno 2005

IOSEPHUS Card. SARAIVA MARTINS
Praefectus

EDUARDUS NOWAK
Archiepiscopus a secretis