LATINITAS
Opus Fundatum in Civitate Vaticana

Commoratus paucos dies in urbe Roma ac in Civitate Vaticana, gratias ago sinceras, quod tam affabiliter et comiter nos recepisti, quinimmo ad cenam invitavisti. Denuo multas gratias Tibi refero pro Publica Laude mihi tributa. Festo Latinitatis die in Curia Riaria celebrato magnum in modum delectabamur, cum a Te atque Tuis collegis amicisque peramabiliter accepti simus. Summa admiratione excitati inopinate a Te in auditorium pontificale ducti sumus, ubi nos humane ac benigne Summi Pontificis oculis proposuisti: res immortali memoria digna, quam nobis vivis contigisse apprime laetamur.

Tibi iucundissimum tempus exopto, quod semper sit plenum commodae valetudinis ac bonarum virium, quae prosint Tibi et Latinitati propugnandae et propagandae. Rogo Te, ut salutes, etiam uxoris meae nomine, Dominos Carolum Cartagenam Secretarium et Horatium Antonium Bolognam.

Vividas gratias accipe, Domine, pro imaginibus photographicis, quae hodie ad me perlatae sunt: sunt imagines perbene expressae et mihi sunt carae memoriae. Ominor Tibi festum quietum nativitatis Christi et annum novum faustum.

Cura, ut quam rectissime valeas.

FRIEDOLFVS RÖSLER

Imagines luce pictas heri accepi. Maximas ergo gratias tibi, Clete, ago. Spero fore, ut Latinitas Benedicto nobis favente et Romae et ubique valeat ac floreat.

His tibi versiculis dicens, o Clete, salutem
optat Martinus, res bene, amice, geras.
Ad partes patrias ex urbe poeta revertit,
Aurea Vindobonam Roma remisit eum:
Liquimus - ah! - Romam; flavi pro Thybridis unda
auribus unda meis danubiana sonat.
Pugnantes pueros video nunc pro Philomusis;
duro Musa fugit victa labore scholae.
Sunt tamen in nostra quaedam solatia terra:
Heus, emere hic pretio zyntha minore licet.

VALE!