 |
LATINITAS
Opus Fundatum in Civitate Vaticana Latinitatis Specimina ERICA SECVM LOQVENS (Haec verba finxi in ore cordeque Ericae De Nardo postquam, in Brixianas custodias inclusa, quadam libertatis hora est nuperrime fruita).
Angustus paries mi passus claudit anhelos
stridentesque fores penitus praecordia figunt.
Sic matri costas fixi ferroque medullas.
Foedavi, turpe est, has palmas sanguine caro:
pulsus adhuc stillat fletuque cruoreque fratris. |
5
|
Quod feci vecors etiamnunc macerat ima;
nempe luam poenas, lacrimis cruor ille lavandus.
Specto exsurgentes soles in carcere vincta
omina concipiens aevi meliora futuri.
Stellas seu miror sparsas per caela serena |
10 |
seu numerare dies compellor gressibus artis
in maerore iacens suspiria pectore duco
atque preces itero citius quo tempora cedant.
Altos trans muros aequales ludere gaudent:
grata iuventa illis fluit haud praeclusa catenis. |
15 |
Invideo ventis et hirundinibus sine terra,
mi fiunt comites solae per caerula nubes.
Fingere mi gratum est de ripa solvere naves
atque super fluctus mecum agmina densa larorum.
Num libertate est aurum pretiosius una? |
20 |
Quis noctis tenebras audet praeponere luci?
ostra quis immutat pecoris cum vellere vili?
Quae nunc me fallit libertas cetera vincit.
Omnibus exoritur Titan, mihi surgit opacus:
omnibus astra ferunt somnos, sed non mihi donant. |
25 |
Iris ut uvida adest imbri sedante furorem
multicolorque nitet nimbis fugientibus atris,
remigiumque iterum scapha tradit fluctibus aequis,
ramus et inflexus rursum viget ut cadit Auster,
crudius et vulnus sanatum non dolet umquam, |
30 |
transibunt lacrimae, transibit et hora sinistra.
Si fiam genetrix! si fiam sponsa fidelis!
Cincta caput pexum velo roseaque corona,
si fortuna favet, placito promissa marito
ante aram Domini sacra pacta iugalia stringam |
35 |
laetitia thalamum partuque auctura penates.
Cum prole atque viro teneant me libera tecta:
mi tandem liceat nova gaudia sumere vitae. |
|
FLORINDVS DI MONACO |
