The Holy See Search

back

riga

LATINITAS
Opus Fundatum in Civitate Vaticana 

 

Scripta in Certamine Vaticano
praemio honestata

ITALVM MVLIEBRI DE FORMA CERTAMEN*

 

Nunc manent suaves specie puellae
tres throno dignae Venerisque palma,
spectat ad summum, studiosa honoris,
                          quaeque tropaeum;
 
haec nigros iactat fluidosque crines,
terga qui lenes lepide coronant,
pupulae fulget radius sub albo
                          perniger ore;
                  5
flexili incedit tenuique dammae
quo solent gressu peragrare saltus,
concitam turbam rapientis ipsa
                         conscia formae;
 
10
magnus in lato resonat theatro
clamor, applaudunt iuvenes ovantes
nec seni parcit remeantis asper
                         aestus amoris,
 

15
Ilii sicut stupuere quondam
vel senes formis Helenae venustis,
mente dum labens latet imminentis
                         causa ruinae.
  


20
Mox pares plausus meret et puella,
flava nec fuci decorata fraude,
quae, comas nodo resoluta, pectus
                         praebet opimum,
 
non Clytaemnestrae similis, roganti
vindices flectat gladios Orestes,
alma quae, letum properare nolens,
                         ubera nudat;
25
spes amat palmae refovere certas
ac suo fidit croceo colore
quod Iovis fulvo meminit calentis
                         tum Ganymede;
 
30
corpore effundit Dryadis saporem
spirat et vultu nemorale quiddam,
veris ut flamen tepidos ad auras
                         halat odores;
 

35
talis urgetur repetita Fauno
nympha per lucos fugiens opacos,
quae, simul pectus tremebunda, raptu
                         gaudet et ipsa:
  


40
cum dei cedit satiatus ardor,
aemulae et silvae, prius infrementes,
iam silent mites, minuente saevae
                         turbine rixae.
 
En subit formae specimen decorae
fomes et plausus cavea tonantis:
affabre virgo prope sculpta corpus
                         Sicelis adstat:
45
in genis fulgor roseis renidet
ac rubor vultu labiisque blandus,
non ut hostilis vomit Aetna rubros
                         dira lapillos
 
50
spargit et late liquefacta saxa,
per plagas ignis furiale flumen,
lugubri terrens Catinae paventes
                         murmure cives;
   

55
huic color condit nihilum tremendi:
tu velim spectes teretesve suras
vel levi iussos numero rotantes
                         rite lacertos;
  


60
verba si promit, modulata scite,
parcus est sermo docilisque mentis,
signa nec profert muliebris illa
                         garrulitatis,
 
quae scatet crebris glomerata nugis
ore nutricis totiens inanis,
fabulis salse tragicus vetustis
                         ut docet auctor;
65
forsitan formae tegumenta inumbrant
intimos sensus potiusve puros,
prisca quos patrum peperere sancti-
                         -monia morum
 
70
atque quae virtus Ithacae refulsit:
ad Lares lassus rediens Ulixes,
heu! memor sponsae, valuit procorum
                         sternere turmas,
 

75
sed magis taedas coluit iugales
in dies telam mulier morando,
tot tenax annos Venerem coercens
                         casta furentem.
  


80
Laude cum tollit patriam puella,
non dolo Siren canit ipsa fallax,
candida at mulcens animi medullis
                         haeret in imis:
 
“fervidi glaebas Siculae feraces
insulae soles refovent benigni,
provide caelo riguus secundat
                         imber ab alto;
85
prospera hic florent onerata suco
poma vel spicis segetes onustae,
frondium ridet tremulo virescens
                         terra colore;
 
90
Inferos linquens tenebrasque Pluton,
hic novos dulcis fremitus amoris
atque non suetos iniisse sensit
                        ossa tremores;
 

95
obstat immanis, minitans voraces
per fretum caedes, inimica Scylla?
facta iam mitis, furibunda nautis,
                        parcit amanti,
  


100
parcit et monstrum nimiam resorbens
fluctuum molem parilemque iactans,
gurgite ad clades habilis Charybdis
                        taetra patrandas.”
 



IOSEPHVS SVPPA

        

* Carmen hoc in Certamine Vaticano L (a. MMVII) aureo nomismate est honestatum.

  

top