|
|
|
|
|
KURÉL BIY ÀND AK PAAP BI
Kerceen yi ak Jullit
yi, ‘Id al-Fitr 1431 H / 2010 A.D. Dëkkub Watikan Sumay xarit jullit yi, 1. ‘Id al–Fitr, di bés biy téj Koor gi, nekkati na ab bunt ngir jottali leen yéeney xaritoo ak mbégte yi jóge ci Kurél biy ànd ak Paap bi di toppatoo Waxtaan wi ci diggantey diine yi. Lu tollook weer wii wépp, yebu ngeen ci ñaan, woor ak a dimbali néew-ji-doole yi, ak it ci gëna dëgëral bokk gi ak xaritoo gi . Yàlla du leen fàttee yool ngir jëf yooyu ! 2. Maa ngiy bànneexu itam ci li ma xam ne ay aji-ngëm ci yeneen i diine, rawati na kerceen yi, jege nañu leen ci bés yii, di bokk séddoo ak yeen, ni ko ndajey xaritoo yi di seedee te ñuy it ay bërëbi wéccoo xalaat ci mbirum diine. Ma di amati mbégte ci yaakaar ne Xibaar bile mën naa am wàll wu rafet ci seeni sotteentey xalaat. 3. Kàddu gi kurél biy ànd ak Paap bi di toppatoo Waxtaan wi ci diggantey diine yi jàpp ren moo di : Kerceen yi ak Jullit yi, nanu ànd daan fitna bi diggantey diine yi, te mu di li ñuy dund jamano jile, ci yenn diiwaani àddina si. Kurél biy liggéeyandoo ak Paap bi, di ko xelal ci waxtaan ak Kurél al-Azhar biy toppatoo waxtaan wi diggantey diine yi gëm ci jenn Yàlla tànnoon nañu ko ni kàddu gi ñuy waxtaane ak a sotteente xalaat ci seen ndaje mu mujj mi ñuy def at mu nekk (ca dëkkub Keer, 23 ak 24-eelu fan ci weeru féwariye atum 2010). Sañ naa séddoo ak yeen yenn punk yi ñu fa tënk ak a dogal te ñu yégle leen ci mujug ndaje moomu. 4. Ci biir li waral fitna yi am diggantey aji-ngëm yi mën nañoo ràññaatle noggatub diine ji ngir jot li ñu bëgg ci fànnu politig ak ñoom seen, fegg nit bi lalu ci xeetam walla diineem xàjjaliku ak ay yi ci wàllu mboolem nawle mi. Ñàkk xam bi, néew-doole ji, ñàkk suqakaliku bi ak ñàkk njubte ji di yeneen bunt yu fés walla làqu yu waral fitna bi am diggantey mbootaayi diine yi, waaye itam ci seen biir sax. Yàlla na Yàlla def ba ñiy jiite réew yi, mboolem nawle mi ak diine yi dugal ci seen loxo ngir dakkal mbir yu metti te bare yooyu ngir jàmmug ñépp ! Yàlla na Yàlla def ba ñiy jiite réew yi ak mboolem nawle mi dëggal ak a dëgëral màggaayu yoon wiy wóoral njubte tigi ngir daan ñiy sooke fitna bi ! 5. Ay ndigal yu am solo lool a ngi ci bataaxal bile itam : ubbi sunu xol ngir baalante ak a juboo, ngir dunde jàmm ju mët sëkk ; xàmme ak a nangu li nu bokk ak a weg wute-wute yi, ni li lal waxtaan wi ; xàmme ak a weg daraja ak sañ-sañu bépp nit, bañ cee boole fegg nit bi lalu ci xeetam walla diineem ; suuxat tëralin yu jub yiy dëgëral dëgg bokk giy dox sunu diggante nun ñépp ; maanaay yar bi ci weg, ci waxtaan ak a xaritoo ci biir bërëb yi ñuy yare : ci kër gi, ci lekkool bi, ci biir jàngu yi ak jumaa yi. Noonu dinanu mëna daan fitna bi diggantey diine yi te suuxat jàmm ji ak déggoo diggantey mbootaayi diine yu wute yi. Njàngalem njiiti diine yi, waaye itam téere yi ñuy jérinoo ci lekkool yi te ñuy bàyyi xel ci wone diine yi ci amaan ju rafet, te mu témboo ak njàngale mi ñu fi baaxoo def. Muy dogal lu am solo lool ci yar ak a yee ndaw ñi. 6. Yaakaar naa ne xalaat yile, ak lépp li ñu mëna jur ci seen biir, yeen ak seeni xariti kerceen, dinañu am wàll ci amal waxtaan wi ànd ak weg, saa su nekk, te gëna yenu maanaa. Ngir waxtaan woowu am laay ñaan Yàlla ay barke yu bare !
Jean-Louis Kardinaal TAURAN Pier Luigi CELATA |
 |