LATINITAS
Opus Fundatum in Civitate Vaticana 

PRAESES SALVTAT SECRETARIVM STATVS,
THARSICIVM CARD. BERTONE

      Optime factum est ut Lunae die IV m. Decembris Tharsicius Card. Bertone, Secretarius Status, coram reciperet linguae Latinae cultores.
      Eum Praeses Operis Fundati ita consalutavit:

      Libenter quidem officio fungor agendi plurimas gratias tibi,
Eminentissime Domine, ob eximiam benevolentiam qua nos coram admisisti, ut aperte declarares etiam animum tuum in humanitatis cultum propensum.
      "Sermo Latinus - dictitabat Iosephus Del Ton quondam apud nos a litteris Latinis - est sermo divinus"; recto iure addere licet ipsum fieri posse sermonem unitatis Ecclesiae etiam hac aetate, qua multi populi, improbo more sibi insidiantes, oppugnare videntur quidquid honesta vitae instituta optimosque mores sapit.
      Si quidem perennis Latinitas "perstat aurea vestis qua Ecclesia sancta ornare voluit divinae revelationis mysteria", hanc, profecto, auream vestem nos servare et defendere conabimur contra hinc atque illinc exsurgentes insidias.
      Velis, Purpurate Pater, pro comitate tua, incepto nostro benigne assentiri.

CLETVS PAVANETTO