Amentes, rabido furore rapti,
effundunt probra mutuo boatu.
"Infantes coquitis foco tenellos,
quorum membra cibi loco voretis".
"Plebi vos alimenta denegatis,
ut cunctas habeant opes potentes".
"Vobis tantum hebetes favent homulli,
qui malunt sibi damna comparare".
"Vos suffragia quaeritis malorum
praedonum, quibus est luenda poena".
"Ut nubant putridi viris cinaedi,
vos concedere vultis indecore".
"Femellas medici vetatis aegras
fretas auxilio creare prolem".
"Afris Italiae plagas amoenas
vastandas dabitis pavore capti".
"Immo vos Arabum cietis iram,
quorum finibus egredi necesse est".
"Nostrates onerabitis tributis,
quae vix pendere squalidi valebunt".
"Vobis est tribuenda duplicati
cuiusvis pretii nefanda culpa".
Ambae iam feriunt diu vibrantes
invicem maledicta saeva partes
nostras auriculas fragore lassas.
Neutram sustineamus usque turmam
donec barbarico tenore tandem
isto deposito silere malint
humanove habitu tenere scaenam!

ORESTES CARBONERO