The Holy See
back up
Search
riga

MAJALISAR PAPAROMA TA TATTAUNAWA TSAKANIN MABIYA ADDINAI

Kirista da Musulmi:
hadin
gwiwa wajen kawar da tashin hankali tsakanin mabiya addinai daban daban

SAKON KARSHEN AZUMIN WATAN RAMALANA,
Id al-Fitr 1431 H. / 2010 A.D.

 FADAR  PAPA  ROMA

Ya Ku Yan’ uwa Musulmi,

1 Sallar Id Al Fitr, da take kawo karshen Azumin Watan Ramalana ta sake ba mu wata dama da za mu sake isar da fatan alherin mu a madadin Majalisar Paparoma ta Tattauna Tsakanin Mabiya Addinai tare da taya murna.

A duk cikin wannan watan  kun dage kun sadaukar da kawunanku cikin yin salloli,  Azumi, Taimakon mabukata da karfafa dankon zumuncin iyali da abota. Ko shakka babu, Allah ba zai kasa yin sakayyar alheri bisa wadannan kyawawan ayyuka ba.

2 Ina farin cikin lura da cewa mabiya wassu addinai, masamman ma Kirista suna kusanci Musulmi a wadannan ranaku kamar yadda ya tabbata wajen aukuwar tarurukan sada zumunci da ke haifar da musayar da kan danganci addini. Abun farinciki gare ni  da nake kyautata zaton  cewa shi ma wannan sakon zai zamanto wata kyakyawar gudumawa bisa naku tunanin.

3 Taken da Majalisar Paparoma ta gabatar a bana, Kirista da Musulmi: hadin gwiwa wajen kawar da tashin hankali tsakanin mabiya addinai daban daban abu ne da ba kamar yadda muka so ya zamo ba, yanzu ya zamo wani babban abun damuwa akalla a wassu yankunan duniya. Ita ma Majalisar Hadin Gwiwan Tattauna Tsakanin Adinnai Masu Litttafai, wanan taken ta zaba a matsayin batun nazari, tunani da musayar ra'ayi a taronta na shekara shekara  da a ka yi a birnin Alkahira (23-24 ga Fabrairu 2010). Bari in bayyana wassu daga cikin shawarwarin da aka zartar a karshen taron.

4 Abubuwan da suke haddasa tashin hankali tsakanin mabiya addinai daban daban sun hada da: yin amfani da addini don biyan bukatun siyasa ko wata manufa daban; Nuna bambanci na kabilanci ko addini, rabe raben matsayin rayuwa suna da nasaba ta kai tsaye ko ta wani gefen daban da tashe tashen hankula tsakanin mabiya addinai. Fatana a nan shi ne Allah ya sa shugabanni su tsaya tsayin daka wajen kare doka da oda tare da tabbatar da adalci, da gaskiya don hana 'yan tada zaune tsaye masu kunna wutar fitina samun damar yin haka.

5 Har ila yau, akwai wassu muhimman shawarwarai da aka gabatar a taron da muka ambata wadanda suka hada da: Bude zukatan mu don yafewa juna da sasantawa don zaman lafiya na amfanin juna, da kuma fahimtar abubuwan da suka hada mu gami da mutunta daraja da 'yancin kowanne dan adam, ba tare da wata kyama ta kabilanci ko addini ba, da kuma bukatar shimfida dokoki a bisa adalci da za su tabbatar da daidaiton kowa da kowa da kuma jawo hankali kan muhimmancin ilimantarwa bisa mutuntawa , tattaunawa da zumunta a fagagen karantarwa daban daban kan gida da makarantu da majami'u da masallatai. Ta haka ne za mu iya kawar da tashin hankali tsakanin mabiya addinai daban daban. Koyarwar shugabannin addinai tare da litattafan makarantu wadanda ke gabatar da addinai ta madaidiciyar hanya suna taimakawa sosai wajen tarbiyar yara manyan gobe.

6 Fata na shi ne lura da wadannan batutuwan da irin fuskantar da ta taso cikin al'ummar ku tare da abokan ku Kirista za ta taimaka wajen ci gaba da tattaunawa da karuwar mutuntawa da kwanciyar hankali wadanda a kan su na ke neman Albakacin Allah

             

 Jean-Louis Cardinal Tauran
Shugaba

                           

Archbishop Pier Luigi Celata
Sakatare

 
top