BENEDICTUS PP. XVI

LITTERAE APOSTOLICAE

VENERABILIBUS SERVIS DEI
FRANCISCO ESTEBAN LACAL ET XXII SOCIIS
BEATORUM HONORES DECERNUNTUR*

Ad perpetuam rei memoriam. — « Dominus Deus aspicit et veritate in nobis consolatur, quemadmodum per personam contestantis cantici declaravit Moyses: “Et in servis suis consolabitur” » (2 Mac 7, 6).

His verbis fratres qui, una cum matre, ad martyrium appropinquabant, suam fiduciam in Deo manifestaverunt, qui defendit et salvat omnes in Eo confidentes. Eodem modo martyres christiani forti et quieto animo passionem martyrii sustulerunt quoniam spem in Domino collocaverunt, qui praemium dat lilis qui usque ad finem remanent fideles.

Venerabilis Servus Dei Franciscus Esteban Lacal eiusque XXI Socii Congregationis Missionariorum Oblatorum Beatae Mariae Immaculatae sodales, necnon Venerabilis Servus Dei Candidus Castán San José, laicus et paterfamilias, peculiari cum liberalitate vocationi ad martyrium responderunt. Hi testes anno MCMXXXVI, tribus diversis diebus, scilicet XXIV mensis Iulii atque VIII et XXVIII mensis Novembris, in Hispania occisi sunt, dum catholica Ecclesia illic persecutionem patiebatur.

Hi sunt:

1. Franciscus Esteban Lacal, presbyter. Natus est Soriae, in dioecesi Oxomensi-Soriana, die VIII mensis Februarii anno MDCCCLXXXVIII. Die XVI mensis Iulii anno MCMVI vota simplicia nuncupavit apud Congregationem Missionariorum Oblatorum Beatae Mariae Immaculatae et die XXIX mensis Iunii anno MCMXII sacerdos est ordinatus. Professoris, superioris aliisque officiis in Congregatione expletis, anno MCMXXXV vocatus est ad Matritum ut munere Superioris Provincialis fungeretur. Illic accepit primos Oblatos profugos qui in initio belli civilis Hispanici ad arbitrium sunt apprehensi, ac deinde die XXVI mensis Iulii anno MCMXXXVI ad tempus liberati. Die autem XV mensis Octobris anno MCMXXXVI Franciscus ipse est apprehensus ac die XXVIII mensis Novembris occisus cum XII sociis Oblatis in loco Paracuellos de Jarama. Veneratione erga hos milites Christi firmiter deinde increbrescente, ii quidem demonstrarunt quantum valeat testimonium omnium martyrum, quippe qui ad sanguinis effusionem suam fidem impavide confiteantur.

Enimvero Deus in eorum morte magnificatur, ita ut quo crudelius illi patiantur eo clarius potentia Eius ostendatur. Ideo eorum de victoria omnes christiani corroborantur et, utcumque necessarium fuerit, vestigia eorum intrepide gradientur.

2. Vicentius Blanco Guadilla, presbyter. Fromistae est natus, in provincia et dioecesi Palentina, die V mensis Aprilis anno MDCCCLXXXII. Simplicia vota emisit anno MCMI et sacerdos ordinatus est Romae anno MCMVI. Fuit magister novitiorum, professor atque superior communitatis in loco Pozuelo de Alarcón. Die XV mensis Octobris anno MCMXXXVI apprehensus, occisus est die XXVIII mensis Novembris eiusdem anni in Paracuellos de Jarama.

3. Iosephus Vega Riaño, sacerdos. In loco Siero de la Reina provinciae et dioecesis Legionensis, die XIX mensis Martii anno MCMIV est ortus. Vota simplicia anno MCMXXII nuncupata, sacerdos ordinatus est Romae anno MCMXXVII, qua in urbe doctoratum adeptus est in iure canonico. Die X mensis Octobris anno MCMXXXVI apprehensus, die VII mensis insequentis in loco Paracuellos de Jarama est occisus.

4. Ioannes Antonius Pérez Mayo, presbyter. Natus est Sanctae Marinae Regis, in provincia Legionensi et dioecesi Asturicensi, die XVIII mensis Novembris anno MCMVII. Sacerdos est ordinatus Romae anno MCMXXXII, qua in urbe consecutus est licentias et in Philosophia et in Theologia. Die XXII mensis Iulii anno MCMXXXVI apprehensus, occisus est die XXIV eiusdem mensis in loco La Casa de Campo, inter locum Pozuelo de Alarcón et Matritum.

5. Gregorius Escobar García, presbyter. Natus est Stellae, in provincia Navarrae et in dioecesi Pampilonensi et Tudelensi, die XII mensis Septembris anno MCMXII. Anno MCMXXX professionem religiosam nuncupavit atque sacerdos est ordinatus anno MCMXXXVI. Die XXVIII mensis Novembris eiusdem anni in loco Paracuellos de Jarama est occisus.

6. Iustus Gil Pardo, diaconus. Natus est die XVIII mensis Octobris anno MCMX in loco Luquin provinciae Navarrae et dioecesis Pampilonensis et Tudelensis. Vota religiosa anno MCMXXXI nuncupavit et ordinem diaconatus anno MCMXXXVI Matriti recepit. Die XXVIII mensis Novembris eiusdem anni occisus est in loco Paracuellos de Jarama.

7. Ioannes Iosephus Caballero Rodríguez, subdiaconus. Ortus est in loco Fuenlabrada de los Montes, in provincia Pacensi et archidioecesi Toletana, die V mensis Martii anno MCMXII, vota religiosa anno MCMXXXVI est professus et subdiaconus ordinatus. Occisus est die XXVIII mensis Novembris anno MCMXXXVI in loco Paracuellos de Jarama.

8. Emmanuel Gutiérrez Martin, subdiaconus. Natus est in loco Fresno del Río, provinciae et dioecesis Palentinae, die I mensis Ianuarii anno MCMXIII. Religiosam professionem anno MCMXXXIV nuncupavit et subdiaconus ordinatus est anno MCMXXXVI. Apprehensus die XXII mensis Iulii anno MCMXXXVI, die XXIV eiusdem mensis est occisus in loco La Casa de Campo inter locum Pozuelo de Alarcón et Matritum.

9. Caecilius Vega Domínguez, religiosus. Natus est die VIII mensis Septembris anno MCMXIII in loco Villamor de Órbigo, in provincia Legionensi et dioecesi Asturicensi. Religiosam professionem anno MCMXXXIV emisit. Apprehensus die XXII mensis Iulii anno MCMXXXVI, die XXIV eiusdem mensis est occisus in loco La Casa de Campo inter locum Pozuelo de Alarcón et Matritum.

10. Publius Rodríguez Moslares, religiosus. In loco Tiedra, in provincia et dioecesi Vallisoletana, est natus die XII mensis Novembris anno MCMXII. Religiosam professionem nuncupavit anno MCMXXXV. Die XV mensis Octobris anno MCMXXXVI apprehensus, occisus est in loco Paracuellos de Jarama die XXVIII mensis Novembris eiusdem anni.

11. Ioannes Petras Cotillo Fernández, religiosus. Natus est in loco Siero de la Reina, provinciae et dioecesis Legionensis, die I mensis Maii anno MCMXIV. Religiosam professionem emisit anno MCMXXXV. Sole orto die XXIV mensis Iulii anno MCMXXXVI apprehensus est et eodem die occisus in loco La Casa de Campo, prope Matritum.

12. Franciscus Polvorinos Gómez, religiosus. Natus est in loco Calaveras de Arriba, provinciae et dioecesis Legionensis, die XXIX mensis Ianuarii anno MCMX. Simplicia vota nuncupavit anno MCMXXXII. Apprehensus die XXII mensis Iulii anno MCMXXXVI, biduo post occisus est in La Casa de Campo, inter locum Pozuelo de Alarcón et Matritum.

13. Iosephus Guerra Andrés, religiosus. In urbe Legionensi ortus est die XIII mensis Novembris anno MCMXIV. Simplicem professionem religiosam emisit anno MCMXXXII. Die XV mensis Octobris anno MCMXXXVI apprehensus, occisus est die XXVIII mensis Novembris eiusdem anni in loco Paracuellos de Jarama.

14. Iustus González Lorente, religiosus. Natus est in loco Villaverde de Arcayos provinciae et dioecesis Legionensis die XIV mensis Octobris anno MCMXV. Simplicem emisit professionem religiosam anno MCMXXXIII. Die XXII mensis Iulii anno MCMXXXVI apprehensus, ortu solis die XXIV eiusdem mensis occisus est una cum IV sociis in loco La Casa de Campo, prope Matritum.

15. Servilianus Riaño Herrero, religiosus. Priori, provinciae et dioecesis Legionensis, natus est die XXII mensis Aprilis anno MCMXVI. Anno MCMXXXIII professionem religiosam simplicem emisit. Apprehensus die XV mensis Octobris anno MCMXXXVI, die XXVIII mensis Novembris insequentis in loco Paracuellos de Jarama interfectus est.

16. Daniel Gómez Lucas, religiosus. In loco Hacinas, in provincia et dioecesi Burgensi, est ortus die X mensis Aprilis anno MCMX. Professionem religiosam simplicem emisit anno MCMXXXV. Die XV mensis Octobris anno MCMXXXVI apprehensus, occisus est die XXVIII mensis Novembris insequentis in loco Paracuellos de Jarama.

17. Iustus Fernández González, religiosus. In loco Huelde, in provincia et dioecesi Legionensi, est natus die II mensis Novembris anno MCMXVI. Anno MCMXXXV professionem religiosam simplicem nuncupavit. Apprehensus die XV mensis Octobris anno MCMXXXVI, die XXVIII mensis Novembris insequentis in loco Paracuellos de Jarama occisus est.

18. Paschalis Aláez Medina, religiosus. Die XI mensis Maii anno MCMXVII natus est in loco Villaverde de Arcayos, provinciae et dioecesis Legionensis. Anno MCMXXXV professionem religiosam simplicem nuncupavit. Die XXII mensis Iulii anno MCMXXXVI apprehensus, occisus est die XXIV eiusdem mensis in loco La Casa de Campo, prope Matritum.

19. Clemens Rodríguez Tejerina, religiosus. Natus est die XXIII mensis Iulii anno MCMXVIII in loco Santa Olaja de la Varga, in provincia et dioecesi Legionensi. Anno MCMXXXV professionem religiosam simplicem nuncupavit. Die XV mensis Octobris anno MCMXXXVI apprehensus, occisus est die XXVIII mensis Novembris eiusdem anni in loco Paracuellos de Jarama.

20. Angelus Franciscus Bocos Hernando, religiosus. Die XXVII mensis Ianuarii anno MDCCCLXXXIII est natus in loco Ruijas, in provincia et dioecesi Santanderiensi. Vota perpetua emisit anno MCMVII. Anno MCMXXXVI apprehensus, cum XII sociis die XXVIII mensis Novembris occisus est in loco Paracuellos de Jarama.

21. Marcellinus Sánchez Fernández, religiosus. Natus est die XXX mensis Decembris anno MCMX Sanctae Marinae Regis, in provincia Legionensi et dioecesi Asturicensi. Perpetua nuncupavit vota anno MCMXXXV. Die XV mensis Octobris anno MCMXXXVI apprehensus, occisus est die XXVIII mensis Novembris eiusdem anni in loco Paracuellos de Jarama.

22. Eleutherius Prado Villarroel, religiosus. Natus est die XX mensis Februarii anno MCMXV Priori, in provincia et dioecesi Legionensi. Simplicem professionem religiosam nuncupavit anno MCMXXXV. Occisus est cum XII sodalibus die XXVIII mensis Novembris anno MCMXXXVI in loco Paracuellos de Jarama.

23. Candidus Castán San José, paterfamilias. Die V mensis Augusti anno MDCCCXCIV est natus in loco Benifayó de Espioca, provinciae et dioecesis Valentinae. Anno MCMXIX uxorem duxit Franciscam Guiral Sorlí, quae ei filiam et filium peperit. Sodalis fuit sectionis Matritensis Adoratorum nocturnorum atque legatus apud Coetum Nationalem Congressus Oratorum Popularium tamquam Consiliarius communitatis Matritensis. Una cum Oblatis, suis sociis in carcere, summo mane die XXIV mensis Iulii anno MCMXXXVI occisus est in loco La Casa de Campo, prope Matritum.

Inquisitio dioecesana ad beatificationem seu declarationem martyrii horum Evangelii testium peracta est Matriti annis MCMXCIX et MM. Decretum validitatis a Congregatione de Causis Sanctorum emissum est die XVI mensis Iunii anno MM. Voto favorabili a Consultoribus Theologis in Congressu Peculiari die XXIII mensis Iunii anno MMX congregatis professo, Patres Cardinales et Episcopi, in Ordinaria Sessione die XVIII mensis Ianuarii anno MMXI congregati, mortem Venerabilium Servorum Dei verum esse martyrium censuerunt. Nos Ipsi die II mensis Aprilis anno MMXI mandavimus ut Congregatio de Causis Sanctorum Decretum super martyrio rite promulgaret et statuimus inde ut beatificationis ritus Matriti in Hispania celebraretur die XVII mensis Decembris anno MMXI.

Hodie igitur, in urbe praedicta, de mandato Nostro Venerabilis Frater Noster Angelus S. R. E. Cardinalis Amato, S.D.B., Praefectus Congregationis de Causis Sanctorum, textum Litterarum Apostolicarum legit, quibus Nos Venerabiles Servos Dei Franciscum Esteban Lacal eiusque XXII Socios in Beatorum numerum adscribimus:

Nos, vota Fratris Nostri Antonii Mariae S.R.E. Cardinalis Rouco Varela, Archiepiscopi Metropolitae Matritensis, necnon plurimorum aliorum Fratrum in Episcopatu multorumque christifidelium explentes, de Congregationis de Causis Sanctorum consulto, auctoritate Nostra Apostolica facultatem facimus ut Venerabiles Servi Dei Franciscus Esteban Lacal, presbyter, et XXI Socii, religiosi Congregationis Missionariorum Oblatorum Beatae Mariae Immaculatae, necnon Candidus Castán San José, christifidelis laicus et paterfamilias, martyres, qui, suae vocationi fideles, constanter annuntiaverunt Evangelium et proprii sanguinis effusione intemeratum amorem in Dominum Iesum eiusque Ecclesiam sunt testati, Beatorum nomine in posterum appellentur, eorumque festum die duodetricesima Novembris in locis et modis iure statutis quotannis celebrari possit. In nomine Patris et Filii et Spiritus Sancti.

Quae vero per has Litteras statuimus, ea firma sint in perpetuum, contrariis quibuslibet non obstantibus.

Datum Romae, apud Sanctum Petrum, sub anulo Piscatoris, die XVII mensis Decembris, anno Domini bismillesimo undecimo, Pontificatus Nostri septimo.

BENEDICTUS PP. XVI

De mandato Summi Pontificis
Tharsicius card. Bertone
Secretarius Status