Rescriptum ex Audientia Sanctissimi (die XXV mensis Martii anno MMXXVI)

RESCRIPTUM EX AUDIENTIA SANCTISSIMI

Summus Pontifex Leo PP. XIV, in Audientia mihi, infrascripto Cardinali Secretario Status, die XXV mensis Martii anno MMXXVI concessa, attenta favorabili de hac re a Papa Francisco, v.m., iam expressa sententia, indulsit, ut Dicasterium pro Institutis vitae consecratae et Societatibus vitae apostolicae competenti Episcopo dioecesano facultatem concederet decretum dimissionis ferendi, de quo in can. 699, § 2, Codicis Iuris Canonici, si professus dimittendus sit Superior maior monasterii.

Summus Pontifex insuper decrevit, ut hoc Rescriptum per editionem in actis diurnis L’Osservatore Romano et in commentario officiali, scilicet in Actis Apostolicae Sedis, promulgaretur atque statim vigere inciperet.

Ex Audientia Sanctissimi, die XXV mensis Martii anno MMXXVI.

Petrus Card. Parolin
Secretarius Status