Pastoralis sollicitudinis onera caritati Nostrae commissa exigunt, ut in omnibus his, per quae christifidelium bono et Ecclesiarum felici regimini consulitur, apostolicae Nostrae auctoritatis partes interponamus eaque studiose foveamus, quae ad animi perfectionem homines perducant et ad christianae redemptionis fructus ceteris impertiendos et quoquoversus propagandos conferre valeant. His perpensis, mentem Nostram convertimus ad dilectos christifideles in Guinea, pro augmento religionis et animarum utilitate postulationem novae dioecesis ibi constituendae attente considerantes, suadente Dicasterio pro Evangelizatione propensoque praehabito voto omnium quorum interest.

Re ergo mature perpensa, preces de his ad Nos admotas animarum saluti valde profuturas censuimus libentesque decrevimus excipiendas. Proinde, Apostolicae Nostrae potestatis plenitudine, territorium in praesens finibus circumscriptum quattuor praefecturarum vulgo Boké, Gaoul, Boffa et Koudara nuncupatarum, ab archidioecesi Konakriensi, ad quam hactenus pertinuit, distrahi statuimus atque ex ita distracto territorio novam dioecesim, Bokensem nuncupandam, erigimus ac constituimus. Huius novae dioecesis sedem in urbe vulgo Boké decernimus templumque ibi exstans, Deo in honorem Sacratissimi Cordis Iesu dicatum, ad gradum et dignitatem ecclesiae cathedralis evehimus, cunctis consentaneis concessis iuribus et privilegiis. Novam insuper dioecesim Bokensem statuimus metropolitanae Ecclesiae Konakriensis suffraganeam et iurisdictioni Dicasterii pro Evangelizatione obnoxiam eiusque Episcopum metropolitico iuri Archiepiscopi pro tempore eiusdem Ecclesiae metropolitanae subiectum. Acta et documenta omnia, quae ad novam dioecesim eiusque clericos, fideles et bona temporalia forte pertinent, a Curia Konakriensi ad Bokensem quam citius transmittantur et in apto archivo custodiantur, ad normam iuris.

Cetera vero secundum normas Codicis Iuris Canonici aliaque ecclesiasticarum legum praescripta temperentur.

Simul ac Bokensis dioecesis erectio ad effectum deducta fuerit, eo ipso censeantur dioecesi illi adscripti sacerdotes, in cuius territorio ecclesiasticum officium detinent; ceteri vero sacerdotes Seminariique tirones dioecesi illi incardinati maneant vel incardinentur, in cuius territorio legitimum habent domicilium.

Ad haec omnia perficienda Venerabilem Fratrem Mambé Ioannem Silvanum Emien, Archiepiscopum titulo Potentinum in Piceno et in Guinea Apostolicum Nuntium, deputamus vel, eo a sede absente, negotiorum Sanctae Sedis in Guinea pro eo gerentem, necessarias et opportunas iisdem tribuentes facultates etiam subdelegandi, ad effectum de quo agitur, quemlibet virum in ecclesiastica dignitate constitutum, onere imposito ad Dicasterium pro Evangelizatione, cum primum fas erit, authenticum exemplar actus peractae exsecutionis remittendi.

Hanc denique Constitutionem Nostram iugiter ratam esse volumus, contrariis quibuslibet rebus non obstantibus.

Datum Romae, Laterani, die vicesimo secundo mensis Februarii, anno Domini bismillesimo vicesimo quarto, Pontificatus Nostri undecimo. 

_______________________

AAS, vol. CXVI, 1 Martii 2024, n. 3, pp. 314-315.