Fidelium vitae spiritalis utilitas, ad quam praecipue studium Nostrum operamque pro munere conferimus, id a Nobis hodie poscit, ut archidioecesis Daressalaamensis et dioecesis Morogoroënsis votis benigne accedamus atque, detractis a duabus praedictis sedibus quibusdam territoriis, nova ibi condatur ecclesiastica circumscriptio.

Idcirco quorum interest cognita sententia, de consilio Dicasterii pro Evangelizatione, plenitudine Apostolicae Nostrae potestatis, novam dioecesim constituimus Bagamoyensem appellandam. Novae ecclesialis communitatis sedem in urbe Bagamoyensi statuimus templumque ibidem exstans, Deo in honorem Immaculati Cordis Beatae Mariae Virginis dicatum, ad gradum evehimus templi Cathedralis, cunctis consentaneis concessis iuribus et privilegiis.

Dioecesim Bagamoyensem Metropolitanae Ecclesiae Daressalaamensis suffraganeam facimus atque iurisdictioni Dicasterii pro Evangelizatione subicimus. Simul ac Bagamoyensis dioecesis erectio ad effectum deducta fuerit, eo ipso sacerdotes dioecesi illi adscripti censeantur, in cuius territorio ecclesiasticum officium detinent; ceteri vero sacerdotes seminariique tirones dioecesi illi incardinati maneant vel incardinentur, in cuius territorio legitimum habent domicilium. Cetera vero secundum canonicas leges temperentur. 

Haec omnia ad expedienda Venerabilem Fratrem Angelum Accattino, Archiepiscopum titularem Sabionensem ac Nuntium Apostolicum in Tanzania, deputamus vel, eo absente, negotiorum Sanctae Sedis ibi gestorem, facta videlicet facultate quempiam alium virum in ecclesiastica dignitate constitutum subdelegandi. Re tandem ad finem perducta, documenta apparentur, quorum sincera exempla ad Dicasterium pro Evangelizatione diligenter mittantur.

Optamus vero ut cuncti novae dioecesis fideles, sub peculiari suavissimae Deiparae praesidio collocati, novis viribus novoque studio peculiarem dilectionem erga Christi Ecclesiam et Evangelium demonstrent atque fidei alacritate in hodiernis adiunctis emineant. Hanc denique Constitutionem Nostram nunc et in posterum ratam esse volumus, contrariis quibuslibet rebus non obstantibus.

Datum Romae, Laterani, die septimo mensis Martii, Anno Sancto bismillesimo vicesimo quinto, Pontificatus Nostri duodecimo.

_______________________

AAS, vol. CXVII, 7 marzo 2025, n. 3, pp. 223-224.