Spei accensa lucerna, eidem, ne exstinguatur, oleum adiciamus fidei et caritatis, dispensationis mercedem tantum a Domino exspectantes neque ovium lac quaerentes tamquam commodum nostrum, atque ex necessitate penuriae nostrae annuntiemus Evangelium, verbi veritatis lucem hominibus parentes illuminandis (cfr s. Augustinus, Sermo 46, 5). In quo apostolicae missionis fundati proposito, dum ad augendam fidelium pietatem et animarum profectum intendimus procurandum, salutare Ecclesiae in Paraguaia comitamur iter, cui quippe provida curamus incrementa comparare. Expostulationi igitur Venerabilis Fratris Nostri Adalberti S.R.E. Card. Martínez Flores, olim Episcopi Villaricensis Spiritus Sancti, hodie Archiepiscopi Ss.mae Assumptionis, audita Conferentia Episcoporum in Paraguaia, concedere volumus, ut Ecclesiae Villaricensis Spiritus Sancti dismembratis territoriis, nova Ultrasilvana dioecesis appellanda erigeretur.

Ideo Nos, praehabito Apostolici Nuntii in Paraguaia, Venerabilis Fratris Vincentii Turturro, Archiepiscopi titulo Rebellensis, favorabili voto deque consilio Dicasterii pro Episcopis, has preces exaudientes, animarum saluti valde profuturas easdem censuimus libentesque excipiendas decrevimus. Proinde, Apostolicae Nostrae auctoritatis ac potestatis plenitudine, a dioecesi Villaricensi Spiritus Sancti distrahere statuimus territorium, prout in praesens lege civili circumscribitur, municipiorum vulgo nuncupatorum: Caazapá, Coronel Manuel Altonio Maciel, Moisés Bertoni, Teniente Coronel Fulgencio Yegros, Yuty, 3 de mayo, San Juan Nepomuceno, Buena Vista, Ava’i, Tava’i et General Morinigo, atque ex ita distractis territoriis novam dioecesim ULTRASILVANAM appellandam erigimus et constituimus. 

Huius novae dioecesis sedem in eadem urbe Caazapá vulgo nuncupata statuimus templumque paroeciale ibi exstans, Deo in honorem Sancti Pauli Apostoli dicatum, ad gradum dignitatemque ecclesiae Cathedralis evehimus. Novam circumscriptionem Ultrasilvanam metropolitanae Ecclesiae Ss.mae Assumptionis suffraganeam constituimus eiusque Episcopum metropolitico iuri Archiepiscopi pro tempore Ecclesiae Metropolitanae subicimus. Congruae sustentationi Praesulis conditae dioecesis provideatur Curiae emolumentis, fidelium oblationibus et portione ei obveniente ex divisione, ad normam canonis 122 Codicis Iuris Canonici facienda, bonorum quae hactenus ad mensam episcopalem atque ad dioecesim Villaricensem Spiritus Sancti pertinuerunt. Ut Pastori novae circumscriptionis ecclesiasticae in eius regimine validum tribuatur adiutorium, Consilium Presbyterale, Collegium Consultorum et Consilium a rebus oeconomicis, quam primum, instituantur. Circa Seminarii dioecesani erectionem necnon candidatorum ad sacerdotium institutionem, praescripta iuris communis serventur, prae oculis habitis normis regulisque a Dicasterio pro Clericis statutis. 

Variis rationibus presbyterorum permanens educatio procuretur. Simul et Ultrasilvanae dioecesis erectio ad effectum deducta erit, eo ipso sacerdotes illi circumscriptioni ecclesiasticae adscripti censeantur, in cuius territorio ecclesiasticum officium detinent; ceteri vero sacerdotes seminariique tirones dioecesi illi incardinati maneant vel incardinentur, in cuius territorio legitimum habent domicilium. Acta et documenta omnia, quae ad hanc novam dioecesim eiusque clericos, fideles et bona temporalia forte respiciunt, a Curia Villaricensi Spiritus Sancti ad Curiam Ultrasilvanam quam primum transmittantur.

Ad haec omnia perficienda iam dictum Apostolicum Nuntium deputamus vel, ipso a sede absente, negotiorum Sanctae Sedis in Paraguaia gestorem, necessarias et opportunas iisdem tribuentes facultates etiam subdelegandi, ad effectum de quo agitur, quemlibet virum in ecclesiastica dignitate constitutum, onere imposito ad Dicasterium pro Episcopis, cum primum fas erit, authenticum exemplar actus peractae exsecutionis remittendi. Hanc, denique, Constitutionem Nostram iugiter ratam esse volumus, contrariis quibuslibet rebus non obstantibus.

Datum Romae, Laterani, die altero et vicesimo mensis Martii, Anno Sancto bismillesimo vicesimo quinto, Pontificatus Nostri tertio decimo. 

_______________________

AAS, vol. CXVII, 4 aprile 2025, n. 4, pp. 290-291.