Incomparabilis Magister noster imagine agricolae patientiae est usus, ut mysteriorum Regni Dei particulam exprimeret, cum de homine dixit qui seminavit in terram. Quamvis agricola dormiret et exsurgeret nocte et die, semen germinavit et increvit. Ultro enim terra fructificavit, primum herbam, deinde spicam, deinde plenum frumentum in spica (cfr Mc 4, 26- 28). Similiter divina gratia ab humilibus initiis annorum decursu quaedam communitates ecclesiales creverunt et floruerunt.

Proinde, Catholicae Ecclesiae in India spectantes incrementa, ut eadem firmius roboretur, suadente Dicasterio pro Evangelizatione, prosperis praehabitis sententiis Conferentiae Catholicorum Episcoporum Indiae et Venerabilis Fratris Leopoldi Girelli, Archiepiscopi titularis Capritani ibidemque Nuntii Apostolici, reque mature perpensa, apostolicae Nostrae potestatis plenitudine, decernimus ac statuimus, ut, integris a metropolitana sede Verapolitana detractis territoriis dioecesium Calicutensis, Kannurensis et Sultanpetensis, nova ex iisdem Calicutensis nuncupanda Provincia Ecclesiastica erigatur, in qua eandem ecclesiam Calicutensem ad gradum et dignitatem Ecclesiae metropolitanae omnibus cum iuribus, privilegiis et praerogativis ad normam canonum extollimus, cui suffraganeas subiciendas disponimus dioeceses Kannurensem et Sultanpetensem. 

Calicutensem hactenus Sacrorum Antistitem, Venerabilem Fratrem Varghese Chakkalakal, ad officium Archiepiscopi Metropolitae novae Provinciae Ecclesiasticae promovemus omnibus cum iuribus, facultatibus et obligationibus, quae huic muneri ad normam iuris competunt. Ad quae omnia, uti supra disposita et constituta, exsecutioni mandanda Venerabilem deputamus iam memoratum Fratrem Leopoldum Girelli, eidem tribuentes necessarias et opportunas facultates etiam subdelegandi ad effectum, de quo agitur, quemlibet virum in ecclesiastica dignitate constitutum, imposito onere genuinum mittendi cum primum fas erit ad Dicasterium pro Evangelizatione peractae exsecutionis exemplar. 

Optamus vero ut cuncti novae Provinciae Ecclesiasticae fideles, sub peculiari suavissimae Deiparae praesidio collocati, renovatis viribus novoque studio peculiarem dilectionem erga Christi Ecclesiam et Evangelium demonstrent atque fidei alacritate in hodiernis adiunctis emineant. Hanc denique Constitutionem Nostram iugiter ratam esse volumus, contrariis quibuslibet rebus non obstantibus.

Datum Romae, Laterani, die duodecimo mensis Aprilis, Anno Sancto bismillesimo vicesimo quinto, Pontificatus Nostri tertio decimo.

_______________________

AAS, vol. CXVII, 20 aprile 2025, n. 5, pp. 351-352.