Ad quem diligere toto ex corde, tota ex anima, tota ex mente debemus, ad Dominum agimus iter, proximum nostrum ita diligendo, ut Deum, nondum videntes, purgatis videamus cordis oculis. Ille enim caritas est (cfr 1 Io 4, 16): panem esurienti cum frangimus, egenum sine tecto in domum nostram cum inducimus, veluti matutina tunc Lux nostra erumpet (cfr Is 58, 7-8), cum qua post saeculi noctem manere desideramus (cfr s. Augustinus, Tract. in Io. 17, 8-9). Quibus binis pastoralis caritatis notissimis permoti praeceptis, salutarem Ecclesiae in Brasilia comitamur navitatem, cui quippe provida curamus incrementa comparare.

Ad satius spiritali christifidelium bono consulendum, Archiepiscopus Metropolita Fortalexiensis, Venerabilis Frater Gregorius Ben Lâmed Paixão, O.S.B., audita Conferentia Nationali Episcoporum Brasiliae, ab Apostolica Sede enixe postulavit ut, ecclesiasticae circumscriptionis sibi concreditae dismembrato territorio, nova exinde erigeretur dioecesis.

Nos ideo, praehabito favorabili voto Venerabilis Fratris Ioannis Baptistae Diquattro, Archiepiscopi titulo Girumontensis et in Brasilia Apostolici Nuntii, de consilio Dicasterii pro Episcopis, preces ad Nos admotas animarum saluti valde profuturas censuimus benigneque excipiendas decrevimus.

Quapropter, Apostolicae Nostrae auctoritatis ac potestatis plenitudine, a metropolitana archidioecesi Fortalexiensi distrahere statuimus territorium, prout in praesens lege civili circumscribitur, municipiorum Acarape-CE, Aracoiaba-CE, Aratuba-CE, Barreira-CE, Baturité-CE, Canindé-CE, Caridade-CE, Guaramiranga-CE, Mulungu-CE, Pacoti-CE, Ocara-CE, Palmácia-CE, Paramoti-CE, Redenção-CE vulgo nuncupatorum, ex quibus novam dioecesim Baturitensem appellandam erigimus et constituimus.

Huius novae dioecesis sedem in urbe Baturité vulgo nuncupata statuimus templumque paroeciale ibi exstans, Deo in honorem Nostrae Dominae de Palma dicatum, ad gradum dignitatemque ecclesiae Cathedralis evehimus.

Novam dioecesim Baturitensem metropolitanae Ecclesiae Fortalexiensis suffraganeam statuimus eiusque Episcopum metropolitico iuri Archiepiscopi pro tempore eiusdem metropolitanae archidioecesis subicimus.

Congruae sustentationi Praesulis conditae dioecesis provideatur Curiae emolumentis, fidelium oblationibus et portione ei obveniente ex divisione, ad normam canonis 122 Codicis Iuris Canonici facienda, bonorum quae hactenus Mensae, vulgo “Mitra”, episcopali Fortalexiensi pertinuerunt.

Ut Pastori novae dioecesis in eius regimine validum tribuatur adiutorium, Consilium Presbyterale, Collegium Consultorum et Consilium a rebus oeconomicis, quam primum, instituantur.

Quod ad Seminarii dioecesani erectionem necnon candidatorum ad sacerdotium institutionem attinet, praescripta iuris communis serventur, prae oculis normis regulisque a Dicasterio pro Clericis statutis habitis.

Presbyterorum permanens apte procuretur institutio.

Cum fas erit, selecti seminarii tirones, philosophicis et theologicis disciplinis imbuendi necnon sacerdotes ad studia complenda, Romam, apud Pontificium Collegium Pium Brasiliense, mittantur.

Simul ac Baturitensis dioecesis erectio ad effectum deducta fuerit eo ipso sacerdotes dioecesi illi adscripti censeantur in cuius territorio ecclesiasticum detinent officium; ceteri vero sacerdotes seminariique tirones dioecesi illi incardinati maneant vel incardinentur in cuius territorio legitimum habent domicilium.

Acta et documenta quae novam dioecesim eiusque clericos, fideles et bona temporalia forte respiciunt a Curia Fortalexiensi ad Curiam Baturitensem, quam primum, transmittantur.

Ad haec omnia perficienda, memoratum in Brasilia Apostolicum Nuntium, deputamus vel, ipso a sede absente, negotiorum Sanctae Sedis in Brasilia gerentem, necessarias et opportunas iisdem tribuentes facultates etiam subdelegandi, ad effectum de quo agitur, quemlibet virum in ecclesiastica dignitate constitutum, onere imposito ad Dicasterium pro Episcopis, cum primum fas erit, authenticum exemplar actus peractae exsecutionis remittendi.

Hanc, denique, Constitutionem Nostram iugiter ratam esse volumus, contrariis quibuslibet rebus non obstantibus.

Datum Romae, apud S. Petrum, die primo mensis Ianuarii, Anno Sancto bismillesimo vicesimo sexto, Pontificatus Nostri primo.