Venerabili Fratri Nostro
Dominico S.R.E. Cardinali Duka
Archiepiscopo emer ito Pragensi

Paracliti afflatus, qui fere tamquam aër in mari spirans Ecclesiae navem in aeternae salutis portum ducit, Decessorem Nostrum Pium XI centum ante annos coegit, ut dioecesim Gedanensem bulla Universa christifidelium cura erigeret, quam posterius s. Ioannes Paulus II documento Totus Tuus Poloniae populus ad gradum archidioecesis metropolitanae evexit. Ipsa enim dilecta Nobis communitas suae fundationis retinens memoriam, hoc Anno Sancto, propter plurima beneficia sollemniore usque modo Dominum laudare desiderat. Quo temporis saeculi spatio hac in circumscriptione plurimi magni momenti eventus, fontes tam crebrorum maerorum quam certae spei, facti sunt, qui non tantum eam ipsam sed etiam totum Poloniae populum alto senso aestimationis et defensionis vere et iuste comprehensae libertatis solidarietatisque signaverunt. Plurimis enim in vexationibus spiritus christifidelium hanc terram incolentium alebatur intercessione s. Adalberti, episcopi et martyris, qui anno CMXCVII vitam suam pro Christo gloriose posuit, evangelizationis missionem explicans, deinde apostolico ministerio et consolationis verbis a Nostro praeclaro Decessore s. Ioanne Paulo II prolatis, qui hanc terram anno MCMLXXXVII et MCMXCIX invisit.

Sicut accepimus ex litteris Venerabilis Fratris Thaddaei Wojda, S.A.C., Archiepiscopi Metropolitae Gedanensis itemque Praesidis Conferentiae Episcoporum Poloniae, Ecclesia ab eo diligenter ducta praecipua est celebratura supradicti iubilaei eventa. Ipsa vero suum fastigium inter Missarum sollemnia proximo die XIV mensis Octobris apud Cathedralem Gedanensem Olivae habebunt. Opportunum ergo Nobis visum est, huius clarae communitatis iuste pondus ac gravitatem considerantes, sicut memoratus Praesul filiali devotione motus quaesivit, ut Patrem Purpuratum destinaremus, qui Nostram personam gereret atque Evangelii sapientia congregatum populum confirmaret.

Itaque virtute harum Litterarum te, Venerabilis Frater Noster, MissumExtraordinarium Nostrum ad illum eventum sollemniter explendum libentes nominamus, ita ut sacris ritibus nomine Nostro praesideas, Dei populum erudiens de necessitate Evangelii nuntiandi atque christiano spiritu transmittendi peculiariter in ambitu domestico, ita ut familia Deo sit fortis et hoc modo fortitudo totius nationis e die in diem eveniat. Quod munus nunc cum maxime, veluti s. Ioannes Paulus II olim asseruit, potest comparari ad v.d. “Westerplatte” locum eiusque defensionem, quod propter notionem suam aetatis etiam nostrae generationibus clare loquitur.

Proinde, Venerabilis Frater Noster, te diligenter quaesumus, ut ibi adstantes cunctos Fratres in episcopatu, civiles Auctoritates, presbyteros, diaconos atque vitae consecratae sodales necnon christifideles laicos comiter salutes, Nostram benevolentiam eis ostendens, quibus omnibus suademus, ut tempore huius Anni Sancti testimonium theologalium virtutum – fidei, spei et caritatis atque sincerae solidarietatis, qua alter alterius onera portat sic legem Christi adimplens (cfr Gal 6,2), imo e pectore perhibeant.

Dum missionem tuam, Venerabilis Frater Noster, praesidio Beatae Mariae Virginis Olivensis, quae familias auxilio suo sequitur, atque martyrum Gedanensium commendamus, Nostram denique Apostolicam Benedictionem, caelestium gratiarum nuntiam, tibi libenter impertimur, quam ad omnes celebrationis participes pertinere volumus.

Ex Aedibus Vaticanis, die XIV mensis Septembris, in festo Exaltationis Sanctae Crucis, Anno Sancto MMXXV, Pontificatus Nostri primo.

LEO PP. XIV