Venerabili Fratri Nostro
CLAUDIO S.R.E. Cardinali GUGEROTTI
Praefecto Dicasterii pro Ecclesiis Orientalibus

Qui de vivis et electis lapidibus aeternum habitaculum suae praeparat maiestati, Ecclesiam ipsam sponsam suam vocare etiam dignatus est (cfr 1Pt 2, 5), ut populus nomini Iesu inserviens et in caelestis aedificationem Ierusalem semper accrescens ad superna promissa per Christi imitationem perveniat. In domo enim visibili, quam Deus Nobis cotidie exstruere concedit, mysterium Eius nobiscum communionis mire figuratur ac perficitur, in quo Ecclesia per terrarum orbem diffusa in dominici compagem corporis augetur in pacis visione complendam; ipsa nimirum est ancora spei hac in nostra aetate, super fundamenta Apostolorum aedificata, summo angulari lapide ipso Christo Iesu (cfr Eph 2, 20).

Quapropter laetanter cognovimus notitiam, festivis caerimoniis et populi frequentia centesimum celebratum iri annum, ex quo praeclara dioecesis Pinskensis Latinorum constituta est. Spiritale illud sparsum semen, divina suffragante gratia, bonis infaustisque temporibus, grandescere valuit atque copiosos ferre fructus.

Quam ob rem, libenti animo rogationem accepimus Venerabilis Fratris Antonii Dziemianko, qui humanissime petivit ut Nos quendam insignem Purpuratum Patrem designaremus qui verba spiritalis cohortationis omnibus adstantibus sollemni Missae celebrandae pronuntiaret.

Ad Te, Venerabilis Frater Noster, decurrimus, quia tibi haud ignota est vita pastoralis illa in Ecclesia ubi sicuti Nuntius Apostolicus quattuor annos operatus es et idoneus occurris ut eventui illi intersis personamque inibi Nostram geras. Te igitur hisce Litteris MISSUM EXTRAORDINARIUM NOSTRUM nominamus ad celebrationes centesimae anniversariae memoriae constitutionis dioecesis Pinskensis Latinorum quae sollemni modo die XXV vertentis mensis Octobris in eadem urbe agentur.

Hac data fausta occasione, omnes participes adhortaberis ut, quemadmodum universae res creatae ad Conditorem suum ordinantur, sua sponte se dirigant ad Ipsum, veritatem primam supremumque bonum.

Episcopum insuper Pinskensem Latinorum ceterosque adstantes sacros Praesules, sacerdotes, religiosos viros mulieresque et christifideles laicos Nostro nomine salutabis. Verba demum Nostrae benevolentiae etiam ad Auctoritates civiles pertinere volumus et ad omnes qui libertatis religiosae notionem, verae pacis rationem atque sincerum personae humanae bonum studiose considerant.

Instanti denique prece Omnipotentem Deum exoramus, ut diligenter officium tibi concreditum expleas, ita ut omnes anniversaria participantes uberibus gratiis a Domino ditentur. Caelestium verum donorum conciliatrix et nuntia esto haec Apostolica Nostra Benedictio, quam tibi, Venerabilis Frater Noster, libenter in Domino impertimur, quam item omnibus congregatis nomine Nostro transmittere properabis.

Ex Aedibus Vaticanis, die VII mensis Octobris, in memoria Beatae Mariae Virginis a Rosario, Anno Sancto MMXXV, Pontificatus Nostri primo.

                                                                                                                                                                                LEO PP. XIV