Venerabili Fratri Nostro
PETRO S.R.E. Cardinali PAROLIN
Secretario Status                                                           

Etiamsi eveniat ut christiani ipsi, difficilibus vitae in adiunctis, habituum libenter mundanis in doctrinis vel politicis et oeconomicis speciminibus innisorum contagione corrumpantur, nihilominus exercitium caritatis Ecclesiae missionis dynamicum manet firmamentum. Numquam enim ipsa, sicut mater, Evangelii assidue remetiendi necessitate permota, pauperum oblivisci potest suorum, universam historiam Dei caritatis proposito fecundans, qui in nobis habitavit ut a servitute, timoribus, peccato mortisque potestate liberaremur (cf. Dilexi te 15-16) quique egenus factus est ut illius inopia nos divites essemus (cf. 2 Cor 8, 9).

Plane huiusmodi pauperum ex parte Dei praelatio primum amore flagrare fecit illud iuvenis Ordinis Sancti Benedicti monachi, cui nomen Ansgarius, ad Danicas gentes iter, anno DCCCXXVI cum Haraldo, qui tum in annum novus erat rex vix sacro fonte renatus, factum, quod Evangelii frumentum ut in Scandinavo solo consereretur permisit.

Nobis profecto de s. Ansgarii in Scandinavia missionis exordii XII centenario nuper adlatum, quod proximi mensis Ianuarii die XXV continget. S. Ansgarii una vero cum s. Paulo, gentium doctore, testimonium Evangelii Christi verba ac monitiones suppeditare valet, ut alacriter et perseveranter quoquoversus salutare dispertiatur nuntium.

Refert igitur et permagni convenit ut hic eventus optimo commemoretur iure, cuius celebratio copiam dat et cunctis facultatem aptas agendi gratias iis qui in huic sanctificationis itineri instant necnon universos ad ferventiorem christianum vitae sensum, firmiorem fidem certioraque proposita permovendi.

Quocirca Venerabilis Fratris Ceslai Kozon, dioecesis Hafniae Episcopi, postulatis benigne subvenire avemus, qui, ritus ille quo elatius evolveretur et luculentius, a Nobis humanissime rogavit ut purpuratum Praesulem mitteremus, vices Romani Pontificis Havniae gerentem ad celebrationem Eucharisticam ibi agendam. Ad te, ergo, Venerabilis Frater Noster, cogitationem convertimus, cui Nostrorum consiliorum proximo participi praestantiora committere solemus, et ipse idoneus occurris qui eventui illi intersis personam sustinens Nostram. Itaque, singulari pulsi affectione, te, harum Litterarum virtute, Legatum Pontificium renuntiamus atque constituimus, mandatis tibi factis, ut nomine Nostro Havniae insignem apud ecclesiam Cathedralem, s. Ansgario dicatam, proximo die XXV mensis Ianuarii, in festo conversionis s. Pauli, apostoli, Missarum sollemniis et aliis celebrationibus supra dictae memoriae praeesse valeas.

Libenter tibi potestatem facimus, dum celebrationi Eucharisticae praesidebis, Episcopum Hafniae, sacrorum alios Antistites, clerum, religiosos viros mulieresque, necnon publicas auctoritates atque universos christifideles Nostro nomine salutandi ac benedicendi, quos cohorteris, ut, s. Ansgarii, incliti Scandinaviae apostoli, caritatis calcantes vestigia spiritalibusque fructibus repleti, pietatem et probanda opera renovato persequantur fervore.

Dum missionem tuam, Venerabilis Frater Noster, praesidio Beatae Mariae Virginis ab Immaculata Conceptione et s. Ansgario commendamus, Nostram denique Apostolicam Benedictionem, caelestium gratiarum nuntiam, Tibi libenter impertimur, quam ad cunctos celebrationis participes pertinere volumus.

Ex Aedibus Vaticanis, die VIII mensis Decembris, in sollemnitate Conceptionis Immaculatae Beatae Mariae Virginis, Anno Sancto MMXXV, Pontificatus Nostri primo.
 

 LEO PP. XIV